تمام شب جہاں جلتا ہے اِک اداس دیا. محسن نقوی

[علی عامر]

[center]بدن سے جو چھو کر ادھر بھی آتا ہے
مثال ِ رنگ وہ جھونکا، نظر بھی آتا ہے

تمام شب جہاں جلتا ہے اک اداس دیا
ہوا کی راہ میں اک ایسا گھر بھی آتا ہے

وہ مجھ کو ٹوٹ کے چاہے گا، چھوڑ جائے گا
مجھے خبر تھی اُسے یہ ہنر بھی آتا ہے

اجاڑ بن میں اترتا ہے ایک جگنو بھی
ہوا کے ساتھ کوئی ہمسفر بھی آتا ہے

وفا کی کون سی منزل پہ اُس نے چھوڑا تھا
کہ وہ تو یاد ہمیں بھول کر بھی آتا ہے

جہاں لہُو کے سمندر کی حد ٹھہرتی ہے
وہیں جزیرہ لعل و گُہر بھی آتا ہے

چلے جو ذکر فرشتوں کی پارسائی کا
تو زیر ِ بحث مقام ِ بشر بھی آتا ہے

ابھی سناں کو سنبھالے رہیں عدو میرے
کہ ان صفوں میں کہیں میرا سر بھی آتا ہے

کبھی کبھی مجھے ملنے بلندیوں سے کوئی
شعاع ِ صبح کی صورت اتر بھی آتا ہے

اسی لیے میں کسی شب نہ سو سکا محسن
وہ ماہتاب کبھی بام پر بھی آتا ہے
(شاعر -محسن نقوی)[/center]

[افتخار]

[چاند بابو]

بہت خوب عامر بھیا بہترین شئیرنگ کا بہت بہت شکریہ.

[علی عامر]

ستائش پر مشکور ہوں

[اضواء]

اسی لیے میں کسی شب نہ سو سکا محسن
وہ ماہتاب کبھی بام پر بھی آتا ہے

بہترین انتخاب پر آپ کا بہت بہت شکریہ

[شاہنواز]

بہت خوب بہت عمدہ انتخاب