وقت میں تبدیلی نہ کرنے کا فیصلہ

[مجیب منصور]

وفاقی حکومت نے فیصلہ کیا ہے کہ سورج کی روشنی سے استفادہ حاصل کرنے کی خاطر پاکستان کا معیاری وقت مزید دو ماہ تک تبدیل نہیں کیا جائے گا۔

یکم جون کو جب حکومت نے گھڑیاں ایک گھنٹہ آگے کرنے کا فیصلہ کیا تھا تو اس وقت کہا گیا تھا کہ یکم ستمبر کو گھڑیاں ایک گھنٹہ پیچھے کردی جائیں گی۔ لیکن اب حکومت نے فیصلہ کیا ہے کہ پاکستان کے معیاری وقت میں تبدیلی یکم نومبر سے ہوگی۔

یہ فیصلہ بدھ کو وزیراعظم سید یوسف رضا گیلانی کی صدارت میں ہونے والے وفاقی کابینہ کے اجلاس میں کیا گیا۔