وہ ساتھ ہو گی

[انور جمال انور]

سمندر میں اتر جائیں گے ہم ، وہ ساتھ ہو گی

نہ مل پائے تو مر جائیں گے ہم ، وہ ساتھ ہو گی

اسے ہم کھینچ ہی لیں گے محبت میں کسی دن

اسے لے کر ہی گھر جائیں گے ہم ، وہ ساتھ ہو گی

ابھی آوارگئ شوق تنہا ہے تو کب تک

کبھی ہوگا ، جدھر جائیں گے ہم ، وہ ساتھ ہو گی

یہ مشکل مرحلہ ہے پھر بھی اس دل کو یقیں ہے

یہاں سے بھی گزر جائیں گے ہم ، وہ ساتھ ہو گی

وہ ہم سے چھین لی جائے نہ ، یہ خطرہ تو ہوگا

ہر اک آہٹ پہ ڈر جائیں گے ہم ، وہ ساتھ ہو گی

بدل سکتی نہیں تصویر ِ ہستی جانتے ہیں

مگر کچھ رنگ بھر جائیں گے ہم ، وہ ساتھ ہو گی

پھر اس کے بعد سب کچھ چھوڑ دیں گے اے زمانے

قسم لے لو سدھر جائیں گے ہم ، وہ ساتھ ہو گی

انور جمال انور

[میاں محمد اشفاق]

واہ جی بہت خوب جناب

[اضواء]

بہت خوب شئیرنگ پر آ پکا بہت بہت شکریہ