اردونامہ فورم

برٹش ہاں نا پاکی ہاں
اک عاجز بندہ خاکی ہاں
میں وچ ولائیت رہندہ ہاں
دُکھ درد ہزاراں سہندہ ہاں
نہ ساڑی ہاں نہ لہنگا ہاں
اک لیراں لَتھی ٹاکی ہاں
برٹش ہاں نہ پاکی ہاں

میں پاؤنڈ کماون آیا ساں
یا نسل گماون آیا ساں
بگڑی نوں بناون آیا ساں
ہُن بن گیا ہجر فراقی ہاں
برٹش ہاں نا پاکی ہاں

میں وطن پیارا چھوڑ دتا
کی کھٹیا کی میں روہڑ دتا
دل میرا دنیا توڑ دتا
شرابی ہاں نہ ساقی ہاں
برٹش ہاں نہ پاکی ہاں

مینوں اپنے وی گل لاؤندے نیئں
نالے گورے وی کول بٹھاؤندے نیئں
دکھ جھلے میں تھوں جاؤندے نیئں
میں آخر اک بلیکی ہاں
برٹش ہاں نہ پاکی ہاں

کوئی بگڑی نیئں بنا سکدا
نسل اپنی نیئں بچا سکدا
دکھ درد نیئں چھپا سکدا
نہ لاٹھی ہاں نہ ہاکی ہاں
برٹش ہاں نہ پاکی ہاں

جد پاکستاں میں جاندا ہاں
اُوہدوں ویزہ وی لگواندا ہاں
نالے دھکے وکھرے کھاندا ہاں
جیویں پاکی بس اتفاقی ہاں
برٹش ہاں نہ پاکی ہاں

پاسپورت تے دو دو رکھدا ہاں
ائیرپورٹ تے فیر وی پھسدا ہاں
میں اپنے آپ تے ہسدا ہاں
کیوں زلت لئی میں باقی ہاں
برٹش ہاں نہ پاکی ہاں
ایتھوں جا کے اوتھے رَلدا نئیں
جیویں کھوٹا سکہ چلدا نئیں
کوئی جیب کٹن توں ٹلدا نئیں
نہ ہون جیہا میں باقی ہاں
برٹش ہاں نہ پاکی ہاں

میں شاعر صدیق دیوانہ ہاں
گھر اپنے وچ بیگانہ ہاں
گل سچی آکھ سنانا ہاں
نہ کردا کوئی چلاکی ہاں
برٹش ہاں نہ پاکی ہاں
اک عاجز بندہ خاکی ہاں

صدیق میرپوری،ہیلی فیکس یوکے

بہت خوب

شئرنگ کا شکریہ